A sa repentina – Rassinia de poesias e canzonis campidanesas

S’arti repentística in Sardigna e in Campidanu

A sa repentina - Narciso Cadoni, Cicciu Trudu i Raimondo MurgiaSa literadura chi oi teneus de su Campidanu (si de literadura podeus chistionai, considerendi sa marginali presenzia de transmissioni po mediu de sa scrittura), s’agattat oindì in d’una condizioni chi podeus nai ancestrali, o siat su cuntestu soziali chi permittit sa difensa de is formas poeticas e liricas e sa transmissioni insoru e tottu bivit oi in Campidanu comenti at biviu e cresciu in is culturas majoris a innantis de su nascimientu de sa scrittura, o mellus nai, ainnantis de s’impreu soziali e artisticu de sa paraula scritta in logu de sa transmissioni orali.

Medas bortas algunus si domandant candu e comenti s’arti de sa poesia improvissada siat nascia, supponendi influenzias de culturas dominantis, lompias po mediu de sa scrittura, ma custa est una oregonta chi no podit agattai respostas giustas, simplementi poita ca sa poesia in dogna cultura populari de su mundu est nascia cun su cantu, e su cantu est nasciu cun s’omini, mentras sa practica de esprimi is fonemas cun simbulus graficus no s’agattat chi no de algunus seculus, troppu pagu in conforma a sa storia de s’omini chi est de milionis de annus.

In prus, in algunus logus, ma forzis ancora sa majoria, sa scolarizzazioni no est ancora brintada a fai parti de is regulas sozialis e in cussas chi sunt is costumanzias creativas de s’omini…

S’arti poetica in Campidanu est ancora arti populari in su sentidu prus sinzillu, fraigada asuba de su connotu, cun d’una evoluzioni longitudinali prus a pretu chi no trasversali, trasmittia de babbu a fillu, de maistu a scienti, cun pagu o nisciuna contaminazioni de culturas chi podeus nai majoris o prevallentis, ni in is formas ni in is cuncettus, comenti sunt stetias in su cursu de is urtimus mill’annus sa creazioni lirica italica e iberica, fillas de sa dominazioni pisana e genovesa, cadelanu-aragonesa e, infisi, piemontesa.

In atterus fueddus podeus chistionai de sa lirica su isolana casi comente unu fossili biventi, chi est lompia finas a su tempu nostu, fait parti a sa prus antiga tradizioni culturali mediterranea, eppuru bivit ancora e bastanti beni in d’una era guvernada de is mass media, de s’informatica, e de unu stadu e una scola chi in practica no reconoscit sa lingua e sa poesia sarda.

Custu no bolit nai chi no siant interbenias variazionis e cust’arti no siat mudada in su cursu de is annus, ma prus a prestu ca su crescimentu est istetiu, i est ancora, guvernau de is leis de cussa censura preventiva tipica de sa tradizioni orali, po sa cali sunt ammittias feti microvariantis, chi depint essi approvadas de sa intera comunidadi is su treto de generazionis ainnantis de brintai a fai parti a su connottu i esii tramittias a is benientis.

Custu sistema rendit is cambiamentus meda prus lentus de is chi acuntessint in d’unu cuntestu literariu “cultu”, aundi est permitiu o mellus nai indispensabili su sumimentu de is formas allotropicas chi condusit a mudai in tempus prus istrintus, de pagus dexenas di annus, is formas is accentus e is cuntenutus, i a scussai sa perfezioni contestuistica e formali de su scrittu prus chi no s’abilidadi espositiva e comunicativa de su esposidori.

In beridadi algunas formas metricas e stilisticas sunt stetias a bortas immittias in su tessiu culturali sardu, movendi de su XVI seculu a su chi connosceus, e, prus e prus in Logudoro ma finas in s’area campidanesa, cun duus estius differentis in is duus terttus.

Su logudoro ad imparau a cantai su versu endecasillabicu, importau in Sardigna de sa grandu poesia italica ariostea e tassiana, e de pustis torrada a s’impreu prus antigu in sa poesia improvvisada e in is canzionis popolaris, cun d’unu processu de “folklorizzazioni”.

In Campidanu is formas impordadas ant tentu prus pagu bonasorti, o mellus no sunt torradas a s’immpreu arcaicu de sa cultura de s’oralidadi, chi abbisogniat di esii cantada po chi possat esprimi is sentidus de s’omini e chi siat proteggia de s’affettu de unu populu.

Sa tradizioni campidanesa prus sustanziali est cyssa de is muttettus e de is canzonis a curbas o a torrada, simbilis strutturalmenti a su cantu “a sa repentina” chi si cantat in su Campidanu de Oristanis.

IS MUTTETTUS 

Su muttettu, in totu is formas suas, si podit nai su rei de is sistemas liricus poeticus icnusicus, connottu coment’est in dogna terttu de diffusioni de sa lingua sarda.

Su muttettu si cantat cun accumpangiamentu vocali monodicu a sa trallallera, a iandimironai e lairellellara accumpangiau de boxis a s’unisonu. Cun s’accumpangiamentu gutturali armonicu a basciu e contra is magasinus e in is cantadas uffizialis, cun is cantadoris mannus, parenti strintu de su cantu gutturali chi nanta a “tenore” in su trettu de Nuoro, cun basciu, contra e s’acciunta de su mesu boxi, e acumpangiat is muttettus a frori, o muttos. A sa ghitarrina si cantat in cumbidus e picchettadas in su Campidanu de Casteddu e in su Sulcis ma finz’e e in is garas logudoresas.

Is launeddas, chi sunt su sonu de riferimentu po s’armonia in su sistema sardu campidanesu, sunt imperadas po sa basi armonica in canzonis a curba o a torradas, in muttettus in medas de is variantis in ora de festas e divertimentus.

A boxi sola sa femina imparat a anninniai is pippius e a attittai a is mortus.

Finas is formas metricas sunt medas e varias.  Sa prus simpli est cussa a due peis, sa prus diffundia cussa a tresi “a froris”, cusa prus imperada in garas poeticas su muttettu longu, a ottu peis.

Ma medas ancora sunt is subvariantis de su muttettu imperadas e po dogna varianti s’agatant differentis subvariantis strutturalis, coment’e su casu de su muttettu a ottu peis chi podit essi tessiu a “scala”, a “ferr’e cuaddu”, a “ispainu”.

Custa constanti diffusioni in su territoriu sardu e sa molteplizidadi de is formas compositivas i espositivas rendit prou de una presenzia antiga e benassortada de su poetai a muttettus in s’Isula.

IS CANZONIS E SA REPENTINA

In su campu de s’arti poetica estemporanea, chi est su fundamentu de dogna attividadi letteraria in is culturas de s’oralidadi, comenti est ancora in sustanzia cussa popolari sarda e campidanesa, podeus seberai is formas dialetticas imperadas  in garas e cantadas, chi sunt cuntenidoris curzus, chi raramenti superant is dexi o doxi versus, i esaltant s’effettu tesi – antitesi, chi sun varius sistemas strutturalis rendit sa “tensioni poetica” de sa gara. Appartenit a i custa categoria su muttettu sardu ma finas s’ottava de tradizioni italica, sa decima iberica e ispanu americana, e ateras struturas metricas diffundias giai in dogna cultura tradizionali de su mundu.

A costau de is formas de repentismu comente i custas, chi podeus nai dialetticas, medas culturas oralis possidint unu sistema de poetai contendi “epicu”. Asuba de sa poesia epica medas tradizionis literarias sunt nascias e si sunt pesadas. Penseus a is aedus de sa Grecia antiga, Omero a primori, Su ciclu de “la chan son de geste” de is “chansonniers” francu provenzalis, “il cantare del mio Cid” de is “romanceros” ispanicus, chi contendi is impresas eroicas de is paladinus ant criau operas monumentalis intr’e is prus majestosas chi sa storia se s’arti letteraria de s’umanidadi apat connottu.

A intrus de i custu capitulu ladu de cust’urtima arti repentistica, chi a bortas podeus nai impura, giai chi su poeta in parti passat in is versus compostus tempus ainnantis de is mannus suus, podit essi classificada sa mado de is canzonis e de su cantai a sa repentina.

In beridadi custus cantus imperant duas formas metricas: su doppiu settenariu (canzoni a curba) e su triplu  settenariu (canzoni a torradas). Sunt sistemas chi, coment’e cussu de is muttettus, no tenint perunu assimbillu in s’arrastru lassau de is culturas mannas, italica e ibarica, chi anti fattu intendi is influssus insoru in Sardigna in s’urtimu millenariu,

Po nai sa beridadi zertus  criticus anti boffiu biri contaminazionis esogenas de is “coplas” catalanas in sa genesi de sa forma a muttettus (G.Solinas, et al.), ma parit pagu cumbincenti considerendi is differenzias metricas (sa cpla est una simpli quarteta de ottonarius a rima attumbada, sempiri chen’e torradas ni arretroga) siat poita ca sa copla at lassau sa sua eredadi in sa quarteta in ottonariu, che finas a su seculu passau at tentu algunu impreu finas in Campidanu, e in sa gobbula sassaresa, sempiri in ottonariu e chen’e torradas, chi stroccit sa “copla” fin’e in su nomini.

Ma sa canzoni a sa repentina est seguramenti antiga meda, tanti de podi essi nada autoctona.

Sa storia officiali fueddat de sa canzoni  a cut¡rba de Dimas Serpi coment’e primu documentu scritu de i custu generi compositivu (F.Onnis). In beridadi Vittorio Angiu, in “Dizionario degli stati sardi”, reportat unu cumponimentu arregortu cun aterus in d’una litera a Umbertu, arci obispu de Casteddu in is primis annus de su XI seculu

Sa moda a sa repentina, tipica de su Campidanu de Oristanis e de sa Marmilla, imperat sa propiu forma metrica de is canzonis, siat de s variedadi a curbas siat de i cussa a torradas, ma ddas imperat in forma de improvvisazioni pura e imperada po s’occurrenzia de is garas poeticas pubblicas.

Custa forma “romancera” de su cantai de sei est unica intr’e is variedadis de su cantai a poesia in Sardigna. Solu in parti funzionalmenti simbili a sa moda de is cantadoris logudoresus, chi est arreservada a is temas religiosus e no imperat sa esposizioni allegorica.

Tottu is formas poeticas consideradas sunt invariabilimenti cantabilis. Su sistema musicali si basat asuba de una scala no temperada.

Is modus esecutivus sunt bundantis in numuru e variedadi.

Is feminas cantant in forma monodica, s’attittidu e s’anninnia, is canzonis podint essi accumpangidas a launeddas o a sa ghitarrina, is muttettus in is cantatas benenint accumpangiaus a basciu e contra o a ghitarra, is muttettus a froris a tenore in sa barbaxa de susu )Orgosolo, Bitti) e a sonettu in su Gennargentu de jossu (Desulu, Tonara), a ghitarra in Trexenta (Seddori), a launeddas in su Sarrabus (Biddeputzu), sa repentina benit accumpangiada a launeddas, a sonettu o a fisarmonica in su Campidanu de Oristanis (Cabras).

Custu grandu cantidadi de variantis, chi sunt in beridadi ligadas a pari a istrintu, rendit contu de cantu siat importanti su impreu de cantai de sei, e duncas de is cantadoris e de is cantadrixis in su preservai is espressionis, is fueddus, is dicius e is formas liricas e prus originalis e sizillas chi sa literadura artistica oi possidat.

Extret d’un llibret de l’associació sarda S’Iscandula


About The Author

Comments

One Response to “A sa repentina – Rassinia de poesias e canzonis campidanesas”

  1. [...] de Masuddas” és un poema de 678 versos, amb mètrica “a s’arrepentina” (veure el post A sa repentina – Rassinia de poesias e canzonis campidanesas ). No coneixem ni l’inici ni l’autor d’aquest poema, però segurament el varen composar a la [...]

Leave a Reply